Baa ĩĩn Yõaannẽ buúk ꞌthooyyiahit cĩ Yeesu ꞌthooyyiahĩĩ ꞌcĩg ĩĩn õmmõtõ hĩ ꞌramma. Baa ẽhẽẽd nẽẽ ꞌbuuk icci, hẽẽl eet cĩg ꞌJudeei hĩ eet ũgĩ helemit Yeesu. Hõllõngaa aduha Yõaannẽ dtẽẽllẽn cĩg rũgẽt cĩ Yeesu, nẽẽthĩ, baa aduha nẽẽ thooꞌthiok ꞌcĩg mẽẽlĩg ꞌcĩg ĩnaat eeta ꞌcĩg baag adĩman Yeesu, hĩ ꞌlimman ꞌcĩ baa allimanĩ Yeesu eeta. Ẽtẽrꞌtha thooꞌthioha cieeg aĩ, baa hõllõngaa ĩĩn Yeesu eet dĩdĩ diooni, nẽẽthĩ, baa ĩĩn nẽẽ Nyekuc dĩdĩ buúk.
Iꞌthianaanĩ ꞌbuuhi ciee ꞌgõõlaa ꞌcĩ ẽtẽrꞌthaanĩ aĩnnĩ, ĩĩn Yeesu thõõth cĩ Nyekuci hode nyeemuut cĩ lootu hĩ ngaatĩ ĩĩnnĩ daahĩthĩ cĩnnĩ, ꞌgaarrieenit ꞌcĩ attik ꞌthẽccanẽẽt cĩg lootu battaala. Nẽ baa ĩĩn Yeesu Krĩstõ ellioohit ꞌcĩ baa udukta põrõvẽtaaꞌnya ꞌBuuhaa cĩ Lõhõt baa ꞌrẽẽnĩ, ngaatĩ akuuni. Dhooriꞌnyaannĩĩ ꞌcĩg ĩĩn 13-17, ẽddẽẽba Yõaannẽ mĩnnan ꞌcĩ ammĩnanĩ Yeesu nuyyiook cĩgĩnnĩg, hĩ thooꞌthiok ꞌcĩg amammaayanĩ nẽẽ ĩhõõggõ ꞌjiaat, õõaa ꞌcĩ nga haggamõõĩ. Aduha dtuurnanĩtĩ cĩ ꞌbuuk icci, ꞌgõõl ꞌcĩ baa ẽttẽẽdõõthĩkĩ Yeesu thõõth hĩ ngaatĩ odooddini hurucceea hĩ ꞌgõõl ꞌcĩ baa arũgthaanĩ daahĩtha hĩ ngaatĩ uppwaannakĩ nuyyiook cĩgĩnnĩg tabattĩ mẽẽlĩg.
