Baa ꞌLuuka ꞌcĩ ẽhẽẽd ꞌbuuk icci nẽ tarĩ ẽtẽhẽẽd ꞌBuuk cĩ ꞌLuuka buúk. ꞌBuuhaa ĩĩcĩ, aduha ꞌLuuka ꞌgõõl ꞌcĩ baa õbõdõõꞌthĩ Yeesu hẽẽtahujjieen. Baa nõõ aduhaak nuyyiooha nyeemuut ꞌcĩ abũnnaa cĩ Yeesu eet cĩg ꞌJudeei ĩĩcĩ oou, looccaa cĩnĩĩng dẽẽdẽ nẽ uduktaak eet ũgĩ buúk nyeemuut ꞌcĩ abũnnaa loonyinii ũgẽẽgĩ vẽlẽk. Aduha ꞌLuuka ꞌgõõl ꞌcĩ baa akuuni Lorii ꞌcĩ Ẽllẽẽmĩth hĩ nuyyiook vẽlẽk cĩg Yeesu. Nẽ aalla ẽtẽrẽth Lorii ꞌcĩ Ẽllẽẽmĩth nuyyiook hõdõõkõthĩ nẽ aaꞌnyĩk ĩhõõggõ hĩ makayyiook cĩggĩĩng ꞌtirriani.
Dhooriꞌnyaannĩĩ ꞌcĩg ĩĩn 1-12, aduha ꞌLuuka dtiic ꞌcĩ baa adĩman ꞌthooyyiahiti ꞌPẽẽtũrũ, hĩ thõõth ꞌcĩ baa adĩmanoothĩk nuyyiook cĩg Krĩstõ ꞌJeruꞌthalẽma. Dtiicanẽẽnnĩĩ ꞌcĩg mẽẽlĩg, baa ẽẽl Lorii ꞌcĩ Ẽllẽẽmĩth nuyyiook hagaacõ hĩĩtõ, baa adiim Nyekuci nyeemuut ꞌcĩ abũnnaa cĩ Yeesu haaꞌnyĩhoothĩk eet cĩg loonyin vẽlẽk, hõllõngaa eet cĩg ꞌJudeei diooni. Nẽ tarĩ dhooriꞌnyaannĩĩ ꞌcĩg ĩĩn 13-28, aduha ꞌLuuka ꞌgõõl ꞌcĩ ẽtẽrꞌthĩ Lorii ꞌcĩ Ẽllẽẽmĩth ꞌPaaulo, hũũhĩ nyeemuut ꞌcĩ abũnnaa ho loonyinii ꞌcĩg mẽẽlĩg, Aaꞌthia hĩ ꞌYuroba nẽ tarĩ dtuurnattaa cĩnnĩ vẽlẽk, aĩ hũũhĩ ꞌPẽẽtũrũ nyeemuut ꞌcĩ abũnnaa ho buúk ꞌtaaũnaa cobbi ĩĩcĩ ꞌRooma. Dtẽẽllẽnĩĩ cĩg vẽlẽk, aduha ꞌLuuka thooꞌthiok vẽlẽk ꞌcĩg baag irrioon ꞌPaaulo hĩ ꞌthooyyiak ũgĩ vẽlẽk. Eelleet thooꞌthioha cieeg ngagĩĩt hetereꞌthieek eet cũũmõ cũũmõ ꞌgoolliohĩ ꞌcĩg mẽẽlĩg nyeemuut ꞌcĩ abũnnaa.
