Baa ĩĩn Maatteeo ꞌthooyyiahit cĩ Yeesu ꞌthooyyiahĩĩ ꞌcĩg ĩĩn õmmõtõ hĩ ꞌramma. Thooꞌthioha ꞌcĩg baag ẽhẽẽdĩ nẽẽ ꞌbuuk icci, ẽhẽẽd huduhaak eet cĩg ꞌJudeei ũgĩ buúk, ngaatĩ ĩĩnnĩ Yeesu Krĩstõ Ellioohit baa aduha Nyekuci aĩ, hĩꞌthõõahi hatĩ ĩhõõggõ.
Ĩnõõ ꞌcĩ baa iꞌthianaanĩ Maatteeo ꞌbuuk ngaatĩ ẽhẽẽdĩ maajihi Yeesu nẽ ꞌbuuhaa ĩĩcĩ hũtũrũũr, baa ẽtẽrꞌtha nẽẽ aĩ, ẽdẽcaak Yeesu dtiicanĩ cĩg thooꞌthiok baag aduha põrõvẽtaaꞌnya ꞌbuuhaa cĩ Lõhõt baa ꞌRẽẽnĩ.
Nẽẽthĩ, aduhaakeet Maatteeo ngagĩĩt ꞌlimman cĩ Yeesu ꞌcĩ aĩ, ĩĩn habuccieet cĩ Nyekuci cĩ loonyin vẽlẽk ꞌcĩg adĩman thõõth ꞌcĩ atab Nyekuci. Dhooriꞌnyaannĩĩ ꞌcĩg ĩĩn 5-7, hadtuuha naag Yeesu allimaneek eet anneek, aaĩ habuccieet cĩ Nyekuci hutuno, dhoortaa ꞌcĩ ĩĩn 10, alliman nẽẽ ꞌgõõl ꞌcĩ ittoorini habuccieet ciee looc hũtũrũũr, dhoortaa ꞌcĩ ĩĩn 13, aduha nẽẽ thooꞌthiok ꞌcĩg awantoothĩk habuccieet cĩ Nyekuci, dhoortaa ꞌcĩ ĩĩn 18, alliman nẽẽ ꞌgõõl ꞌcĩ haattiyyi naag habuccieetaa cĩ Nyekuci nẽ dhooriꞌnyaannĩĩ ꞌcĩg ĩĩn 24-25, ẽtẽrꞌtha nẽẽ ꞌgõõl ꞌcĩ hatĩ akuuni habuccieet cĩ Nyekuci loota nĩnga. Adtuurnik ꞌbuuhi ciee ngaatĩ aduhaanĩ tilooinit cĩ Yeesu cobbi, ꞌcĩ aaꞌnyĩk ꞌthooyyiak cĩgĩnnĩg hõõt hillimatteek eet loonyini vẽlẽk, hĩĩtõ nuyyiook cĩgĩnnĩg.
Aduha ꞌbuuhi ciee dtẽẽllẽn cĩg rũgẽt cĩ Yeesu ngaanĩngĩtĩ ꞌthianaattõ ĩꞌthõng dtuurnanĩt. Atiman ꞌtirriaanĩt cĩ Yeesu, nẽ ẽdtẽbana baattithimo cĩnnĩ hĩ ꞌtĩmman ꞌcĩ attĩmanĩ ꞌThĩttaanĩ ĩnõõnnõ nẽ tarĩ uduha dtẽẽllẽn ꞌcĩg irriõõnĩ nẽẽnĩ, hĩ ꞌlimman hĩ thõõth ꞌcĩ aaꞌnyĩkĩ eet hũbũttaathõ ꞌGalileea. Nẽ tarĩ eheeddi ꞌbuuhaa cĩ thõõth cĩ heeroni cĩ Yeesu ꞌcĩ ĩngaannĩ ꞌGalileea nẽ ũũk ꞌJeruꞌthalẽma, hĩ thõõth ꞌcĩ baa aluba lomidikaawa cĩ rũgẽt cĩnnĩ ꞌcĩ adtuurna loota nĩnga, edecciaa ꞌbuuhi ciee daahĩthaa ꞌcĩ õdõddõthõõthĩkĩ Yeesu hurucceea hĩ rũgẽt ꞌcĩ arũgnaanĩ nẽẽ daahĩtha.
