Baa lõõcĩ ꞌtur, baa ĩĩn nyĩlõhĩ ꞌramma, cĩ nyĩlõk cĩ iyyio irkit cĩ 2018, baa ĩꞌngaanneet tẽẽra cĩ Maavĩ Juubattĩ, eet ꞌcĩg baag hĩĩgĩnna õmmõtõ, okooyyeet Cuhuduma, hĩnĩngĩtĩ kõr cobbi gẽrrẽẽt cĩ ꞌBuuk cĩ Thõõth cĩ Nyekuci Dĩdĩngayyi. Ma baa õdõlanit kẽddẽbĩna ĩĩtõ hẽẽn ꞌtur, hĩcĩtta haautta Cuhuduma, hupwaananna ĩcĩ Mõnĩta. Hiita hatawatta Cuhudum, ma baa hililaatta hoottia ĩcĩ hilonganĩ ꞌcĩ tẽẽraõ nẽ iggiingi tẽẽra ũũk udhukia loota, hĩcĩtta ngaaĩ cĩg Legio Maria hĩ ngaaĩ ꞌcĩg ahimti cẽrẽmẽẽnnĩĩ cĩg nyakũrũtaak.
Ikia õbõdõõthi tẽẽra, baa nga hĩꞌthaaonna hĩ eet Mataraawa, ũũhĩk Mothinyõõre Tomas Olĩha, ꞌcĩ ĩĩn makayyioohit cĩ Diocese cĩ Katolika cĩ Toriti vẽlẽk, hĩ Paadĩr ꞌcĩ anũẽẽkĩ ĩnõõnnõ, Paadĩr Arkanjelo Lokoro. Baa aduhaakeet ꞌthũaahĩ cĩ tẽẽraõ anneekeet, hõbõda hatĩ urutaa cĩ hẽddẽẽbĩn hẽẽn ꞌramma hĩ ꞌtur thõng. Ma baa hiꞌthaayyia eet ꞌcĩg ĩthaayyeet Mataraa ho ẽlẽk, iita oottieet toromilita ꞌwec ĩcĩ Miiꞌthoni. Ma ꞌgõõla oovithaa cĩ lõhõlĩ cĩg thukuullak, homottiowa hĩ lõhõlĩ ꞌcĩg thukuulak ꞌcĩg kidicigꞌcĩg ĩꞌthaayyeet nĩngaata. Hiita hibillia nõõ nĩgaata hĩdĩhĩdĩĩc, nẽ hiꞌthaayyia lõhõlĩ tĩko.
Ma nĩngaata, hedeccieeha hoottia toromiliti ĩcĩg ĩĩn ꞌwec ko ĩꞌthõng hõdõlatta Ekeleꞌthia cĩ Katolika Miithoni. Ma baa haduknaanna toromiliti battaaala ho, iita oottieet eeta ꞌthõõnĩ ĩcĩ õlõ cĩ paadĩrĩ. Nĩngĩtĩ hiyyiomanna õlõõ cĩ Padĩr Dario Apii, ꞌcĩ ĩĩn makayyioohit cĩ Miithon cĩ Katolika Cuhuduma.
Ma baa lõõcĩ tõrkõnõn, baa ĩĩn nyĩlõhĩ iyyio cĩ nyĩlõk cĩ iyyio, ikia iꞌthianaaĩ karrama cobbi ngaalloohoth; baa aitoo Miiꞌtha tõõ. Ikia iꞌthianaanĩ kõrra cobbi booboleettaa ĩcĩ hidici, ngagõõng hallimanna naag limmanniook cĩg loholeenu Palikaawa. Aluttiaa eeta hĩdĩĩc hĩdĩĩc nĩngĩtĩ abbĩnnĩ lõõcĩ eet ꞌcĩg mẽẽlĩk gẽrrẽẽt ꞌcĩg ĩllõõan alib kodẽĩ. Baa aku Paaulo Langa, ꞌcĩ anũẽẽkĩ Governor Ukumaawaa cĩ Hapwata, õõkõra hĩ Peter Bosco Lottiaang, eet ꞌcĩ õthõõth nyakẽrẽtaa cĩ Ukuma cĩ Hapuata; hĩ Ministarnya cĩg Kumaak ꞌcĩg ngayyik ꞌramma, umwa cĩ Thukulliohu, hĩ umwa cĩ Thõõth cĩ Nyekuci hĩcĩ Taallieetu; hĩ MPnya ramma: Jervathio Ammotuun hĩ Yothebo Atiol Beato. Baa aku Commissiner cĩ Loꞌngarrimu buúk karramaawaa cĩ, nẽ baa aaĩ Commissioner cĩ Cuhudumi buúk tõõ, Commissioner Rhino Loremo. Baa au eeta lõhẽlẽa hĩdĩĩc hĩdĩĩc, ma baa õbõhĩ aau kõrra lokora, iita ittoorri eeta, nĩngĩtĩ ammũlũũnyanĩ Palika, hĩĩtõ eeta mẽẽlĩk gẽrrẽẽt hĩllõõanit alib hõdẽĩ.
Ma baa othoothito eeta cĩg obbitig vẽlẽk, hiita hoottia nõõ duhẽẽttaa cĩ waathinu, ma baa huduktooa ẽlẽk, hõõt hiꞌthiaattaayyia naag hĩ Richard Lõttĩmanimõõĩ hutuuyyioyyia ꞌBuuhẽt cĩ Thõõth ꞌcĩ Nyekuci, adahĩ hõdẽẽthõng rabbẽẽt ꞌmiia hõdẽĩ hĩ hẽẽn ꞌtur: (150ssp). Baa ũũt eeta kõrtõõnĩt turkiyyio kõrraa cobbi ho, ĩĩn ꞌBuuhẽta kortoona hõdẽẽthõng hẽẽn iyyio hĩ ꞌramma. Ma baa nga hũũtẽnĩĩ naa ꞌBuuhẽt cĩg Nyekuci ho, iita ũrũgũmta eeta cĩg Bẽtaladõ hĩ cĩg Kĩkĩlaĩ õdõlanit Miithon. Baa occa ĩĩn nẽẽg eet hẽẽn ꞌtur. Baa au eeta hõdẽĩ hõdẽĩ ĩcĩ Lotukei hĩ Loudoottĩ hĩ Ngathĩllaanĩttĩ, baa ngatũrĩk eeta cĩg Ngathĩllaanĩ. Au eet cĩg Nguuro buúk hõdẽĩ hõdẽĩ.
Hatalit gẽrrẽẽt ngaatĩ othoothikeet Baangẽẽtĩ Makayyioohiti Maaꞌnyĩ Ellioohit cĩnaac Yeesu Kristõ, Bẽẽ cĩ Dĩdĩnga thõõthaa cĩ Dĩdĩnga! Hĩĩttĩk Baangeet hĩ Yeesu Kristõ hĩ Lori ꞌcĩ Ẽllẽẽmĩth ĩlaallẽ, Baangeet Nyekuc cĩ Dĩdĩnga! Limmaneet nẽ aaꞌnyeet hĩthĩkta Thõõth cunni rũgẽtaa cĩnaang ũdũt! Ma hatĩ kõr ꞌcĩ aũyyeet nii ngagĩĩt hõdẽĩ hõdẽĩ, hammũdaaki hatĩ õlõ, ngaatĩ aayyi niina!
Photos by Richard Malik, Jackie Marshall-Ringer, Wes Ringer and Tanya Spronk
